þriðjudagur, 30. september 2014

ný keramiklína: POME-POME


Eruð þið að leita að fallegum og stílhreinum munum til að prýða borðið ykkar, einhverju nýju til að safna? Nú í haust er væntanleg á markað ný keramiklína, POME-POME, frá hinni dönsku Malene Helbak, sem hún hannaði í samstarfi við sænska grafíska hönnuðinn Nygårds Maria. Þær stöllur sóttu innblástur í jurtaríkið og allir munirnir eru hvítir með sæbláum og petról-bláum (er til íslenskt heiti yfir svona lit?), mintugrænum og appelsínugulum tónum. Er það klisja að segja að það gerist varla skandinavískara? Ég veit ekki með ykkur en ég gæti vel hugsað mér að dekka mitt borð með þessum munum.

mynd:
af vefsíðu Bo Bedre


föstudagur, 26. september 2014

góða helgi

Um leið og ég óska ykkur góðrar helgar þá langaði mig að segja að nú er tískuvikan í París í fullum gangi og ég hlakka svolítið til að sjá hvað Isabel Marant sýnir í dag. Annars er ég mikill aðdáandi belgíska hönnuðarins Dries Van Noten, en sú aðdáun hófst áður en við fluttum til Antwerpen á sínum tíma og gerði ekkert nema að dýpka í þau tvö ár sem við bjuggum þar. Ég póstaði nokkrum myndum úr línu Dries Van Noten fyrir vorið 2015 á ensku útgáfunni í dag. Ef þið hafið áhuga á textíl þá skuluð þið endilega smella á tengilinn.

mynd:
Lisa Cohen fyrir Vogue Living


fimmtudagur, 25. september 2014

rýmið 74

- stofa eða leskrókur með arni í hlutlausum tónum í Hollywood
- eigandi er Darren Star, maðurinn á bak við sjónvarpsþætti eins og Sex and the City, Beverly Hills, 90210 og Melrose Place
- innanhússhönnun var í höndum Waldo's Designs og um arkitektúr sá Rios Clementi Hale Studios

mynd:
Roger Davies fyrir Architectural Digest, mars 2012


miðvikudagur, 24. september 2014

tískuvikan í Mílanó: Emilio Pucci vor 2015

Það fer ekkert á milli mála að ítölsku hönnuðurnir sem sýndu vorlínur sínar á tískuvikunni í Mílanó eru með hugann við 8. áratuginn. Um daginn sýndi ég ykkur brot af línu Frida Giannini fyrir Gucci og sömu strauma mátti sjá hjá Peter Dundas fyrir Emilio Pucci tískuhúsið. Að vísu er það ekkert sem þarf að koma á óvart þegar Dundas á í hlut því það má alltaf treysta á mynstur og víða, fljótandi kjóla frá honum, eða maxi kjóla, eins og þeir kallast. Hér eru nokkar flíkur og stíliseringar sem heilluðu mig og ég verð að minnast á klútana sem mér finnst svakalega smart.
mynd:
Emilio Pucci vor 2015 af síðu Style.com


mánudagur, 22. september 2014

ný bók: Modern Country eftir Caroline Clifton-Mogg

Um daginn minntist ég örstutt á nýja bók sem ég var að lesa og lofaði að deila með ykkur. Hún var gefin út í síðustu viku og nefnist Modern Country: Inspiring Interiors for Contemporary Country Living eftir Caroline Clifton-Mogg. Útgefandi er Jacqui Small. Ég fékk sent eintak frá forlaginu og skrifaði um bókina á ensku útgáfu bloggsins í dag ef þið hafið áhuga á að kíkja, en hér er smá sýnishorn úr bókinni sem er virkilega falleg.
myndir:
Allar myndir frá Jacqui Small, úr bókinni Modern Country eftir Caroline Clifton-Mogg


fimmtudagur, 18. september 2014

tískuljósmyndun: fyrirsætan Daria Werbowy

Mig langaði að halda áfram með eitthvað tískutengt á blogginu í dag en vildi samt hvíla tískupallana þar sem ég hef ekki gefið mér tíma til að kíkja á meira frá tískuvikunni í Mílanó. Ég fékk svo þá hugmynd að raða saman nokkrum af mínum uppáhaldstískuljósmyndum af hinni vinsælu Daria Werbowy, sem er ein af þessum ofurfyrirsætum sem skilar alltaf sínu og prýðir reglulega forsíður og auglýsingaherferðir. Hún er fjölbreytileg og svo þykir henni víst gífurlega gaman að ferðast, sem er kannski ástæða þess að hún er oft í ljósmyndum sem teknar eru á framandi stöðum. Mig minnir að ég hafi lesið einhvers staðar að hún taki stundum að sér verkefni á miðju ferðalagi, en það er kannski eina leiðin fyrir tískutímaritin að ná henni. Það er ástæða fyrir efstu myndinni því stundum finnst mér gaman að sjá sömu flíkurnar í mismunandi tískuþáttum til að bera saman stíliseringuna. Myndin sýnir hlutlausan bakgrunn þar sem Céline-toppurinn sem Daria klæðist fær að njóta sín. Þessi sami toppur var svo til dæmis notaður í ljósmyndaþætti í Vogue US (sem ég deildi á ensku útgáfu bloggsins), en þar var það fyrirsætan Sasha Pivovarova sem klæddist honum og innblástur var sóttur til listakonunnar Georgia O'Keeffe. (Allar nánari upplýsingar um myndirnar - ljósmyndara, stílista o.s.frv. - er að finna neðst í póstinum.)
myndir:
1: Daniel Jackson fyrir Harper's Bazaar US, febrúar 2014 - The Edge of Spring • stílisering Alastair McKimm af blogginu Just Angelina | 2-3: Patrick Demarchelier fyrir Vogue UK, júní 2009 - Indian Summer • stílisering Lucinda Chambers af the Fashion Spot + Pleasurephoto | 4: Mert Alas + Marcus Piggott fyrir Interview, september 2013 • stílisering Karl Templer af Models.com | 5: Cass Bird fyrir Maiyet, auglýsingaherferð vor 2013 af blogginu Classiq | 6: Mikael Jansson fyrir H&M, auglýsingaherferð vetur 2012 • stílisering George Cortina | 7: Peter Lindbergh fyrir Vogue US, janúar 2011 - Brief Encounter (með ameríska leikaranum David Strathairn) • stílisering Grace Coddington af síðu Fashion Editorials | 8: Paolo Roversi fyrir Vogue Paris, mars 2004 • stílisering Carine Roitfeld af Pinterest | 9: Gui Paganini fyrir Vogue Brazil, mars 2007 af blogginu The Daria Files Gallery


miðvikudagur, 17. september 2014

tískuvikan í Mílanó + London: Gucci + Paul Smith

Nú er tískuvikan í Mílanó hafin en ég bíð alltaf spennt eftir henni. Ítölsku tískuhúsin geta eiginlega ekki klikkað. Gucci kynnti sína línu í dag en þar er Frida Giannini við völd og hún var innblásin af 8. áratugnum. Það var margt fallegt í línunni hennar og mikið um föt sem eiginlega eru alltaf í tísku, eða hverfa í smá stund og koma svo aftur. Litapalettan innihélt eitthvað fyrir alla og gallaefni og rússkinn voru áberandi. Og ekki má gleyma öllum fallegu aukahlutunum; dásamlegu úrvali af beltum, töskum, klútum og skófatnaði.

Mig langaði að birta þessa tvo kjóla í fullri stærð en það voru ekki til myndir af þeim í stærri upplausn, því miður. Dressið hér að neðan er svolítið skemmtilega náttfatalegt. Ég er lúmskt skotin í því og fíla mynstrið.
Ég get ekki sagt að ég sé búin að skoða allt sem birtist á tískupöllunum í London en það sem ég gaf mér tíma til að renna í gegnum höfðaði ekkert sérstaklega til mín. Það var eiginlega bara PAUL SMITH sem heillaði mig með alls kyns röndum og þægilegum og einföldum flíkum.

myndir:
1-5: Gucci vor 2015 | 6-11: Paul Smith vor 2015 af vefsíðunni Style.com


mánudagur, 15. september 2014

innlit: heimili listakonunnar Pepa Poch á Spáni

Þegar ég rekst á heimili listamanna sem eru jafn falleg og þetta þá fæ ég allt að því skjálfta í hnén. Hið vinsæla tímarit Lonny er ókeypis á netinu og septemberútgáfan er öll hin glæsilegasta. Þau heimsóttu katalónsku listakonuna Pepa Poch sem býr í hvítmáluðu húsi á Costa Brava á Spáni með útsýni út á Miðjarðarhaf. Ég allt að því slefaði þegar ég sá pússuðu gólfborðin, svo ég minnist nú ekki á loftbitana sem hafa verið málaðir með bláum tón. Það eru einmitt þessir bláu tónar hér og þar um húsið og í listaverkum Poch sem heilla mig. Ég er auk þess ákaflega hrifin af svona hráum stíl, þar sem steinn og viður leika aðalhlutverk, sérstaklega þegar hann er hlýlegur eins og á þessu heimili. Það eru fleiri myndir á vefsíðu Lonny ef þið viljið sjá meira og að sjálfsögðu smá viðtal við listakonuna.
myndir:
Albert Font fyrir Lonny, september 2014


fimmtudagur, 11. september 2014

heimagerður hindberjasafi í boði Ikea

Í júlí rakst ég á þessa fallegu mynd á Livet Hemma, bloggi sem sænska Ikea vefsíðan heldur úti. Stílistarnir þeirra útbúa oft skemmtilegar matarmyndir þegar verið er að kynna nýja eldhúslínu eða muni og þá fylgir gjarnan uppskrift. Ég hef ekki prófað þessa uppskrift að hindberjasafa sem inniheldur 2 kíló (4 lítra) hindber, 1½ lítra vatn, 1 kíló sykur og safa úr 1 sítrónu. Mér finnst sykurmagnið alltof mikið og myndi alveg örugglega minnka það verulega og nota frekar blöndu af lífrænum hrásykri, agave sírópi og stevia dropum.

Sigrún vinkona, sem heldur úti CafeSigrun vefnum, sendi mér flösku af Via Health stevia dropunum um daginn sem ég er búin að vera að prufa mig áfram með og mér líst vel á þá. Eftir flutningana til Englands datt sonur okkar beint inn í bresku tehefðina og fær sér alltaf te á kvöldin í stórum bolla, rosa fínt Earl Grey te frá Clipper, sem honum þykir best. Hann notar út í það mjólk og demerara sykurmola og ég er búin að reyna að fá hann til að minnka sykurmagnið. Núna samþykkir hann að nota 1 mola og stevia á móti. Ég prófaði svo að baka glútenlausa súkkulaðiköku í gær þar sem hluti sætunnar var stevia og hún heppnaðist mjög vel. Sem betur fer er ekkert glútenóþol á okkar bæ en mig langar að eiga góða uppskrift ef gesti með slíkt óþol ber að garði og mig langar líka að hafa uppskriftina á matarblogginu. Ég deili henni þegar ég er búin að negla hana niður.

Talandi um Sigrúnu, sáuð þið sýnishornið hér á blogginu úr uppskriftabókinni hennar? Bókin er ekki enn komin út en ég læt ykkur að sjálfsögðu vita hvenær það gerist.

mynd:
Malin Cropper fyrir Ikea Livet Hemma


miðvikudagur, 10. september 2014

tískuvikan í New York: vor 2015

Hvað segiði um tískuvikuna í New York, eruð þið að fylgjast með? Ég get ekki sagt að ég hafi legið yfir þessu en ég bíð alltaf nokkuð spennt eftir því að sjá hvað ákveðnir hönnuðir kynna. Að mínu mati eiga Olsen systurnar, sem hanna undir heitinu The Row, eina bestu vorlínu ársins 2015. Ég deildi hluta af henni í dag á ensku útgáfu bloggsins ásamt nokkrum flíkum frá Jason Wu og Donna Karan. Ég vildi ekki endurbirta þær myndir hér heldur kaus að sýna ykkur nokkrar frá Halston Heritage, Michael Kors, Tory Burch og Diane von Furstenberg.

Marie Mazelis hjá HALSTON HERITAGE kynnti vorlínuna daginn áður en sjálf tískuvikan hófst og í henni er að finna margar virkilega fallegar flíkur fyrir þetta endurreista tískuhús, sem Roy Halston Frowick setti á fótinn á 7. áratugnum og er oft kennt við Andy Warhol og Studio 54-tímabilið. Ég hefði gjarnan viljað birta fleiri myndir en það er því miður einhver tæknivilla á vefsíðu Style.com og sumar myndir tískuhússins birtast ekki í stórri upplausn. Leikkonan Sarah Jessica Parker á sennilega einhvern þátt í því að tískuhúsið var endurreist því sem dæmi klæddist hún svo til eingöngu gömlum Halston-flíkum í síðari Sex and the City-kvikmyndinni, sem heldur betur vöktu athygli.
Það er alltaf hægt að treysta á að hönnuðurinn MICHAEL KORS sýni föt sem höfði til sem flestra, fallegar og klassískar flíkur sem auðveldlega rata í fataskápinn og eru notaðar. Sýningarnar hans eru auk þess skemmtilegar að því leyti að hann sýnir alltaf herrafatnað um leið og hann kynnir kvenfatnaðinn. Ég kaus að birta bara þrjár myndir til að drekkja ykkur ekki, en í vorlínunni hans er að finna fallegar ljósblár skyrtur, nokkrar sólgular flíkur sem voru ansi smart og alls kyns mynstraðar flíkur. Kvöldfatnaðurinn einkenndist svo af svörtu.
TORY BURCH telst seint til minna uppáhaldshönnuða en guli liturinn í palettunni hennar fyrir vorið 2015 finnst mér ákaflega fallegur, þessi sem sést á mynstraða pilsinu. Þegar mynstrum er blandað svona saman er útkoman annaðhvort virkilega smart eða ekki, það er eiginlega enginn millivegur þar, alla vega ekki að mínu mati. En þessi samsetning hér að neðan fær mitt samþykki.

Ég veit ekki hvernig ég á að lýsa því en það er yfirleitt þannig með línurnar frá DIANE VON FURSTENBERG að þær annaðhvort hrífa mig eða þá að ég finn bara eina flík sem ég gæti hugsað mér að eiga. Oftast eru það bara sniðin sem höfða ekki til mín. Vorlínan hennar fyrir 2015 er þannig að ég heillaðist bara af þessum eina kjól. Og það skemmtilega er að þegar hún svo steig á tískupallinn í lok sýningarinnar þá klæddist hún sjálf einmitt þessum sama kjól. Hún er orðin 67 ára gömul en er enn svakaleg skvísa.
myndir:
1-4: Halston Heritage vor 2015 | 5-7: Michael Kors vor 2015 | 8-11: Tory Burch vor 2015 | 12: Diane von Furstenberg vor 2015 af vefsíðunni Style.com