fimmtudagur, 23. maí 2013

innlit: landareign í suðurhluta Wales

Ég pósta því sama á báðum bloggunum í dag en samt ekki sömu myndunum, þessar koma annars staðar frá. Áður en ég segi ykkur frá þessari landareign í Wales þá vildi ég láta ykkur vita að ég verð í bloggfríi þar til í byrjun júní. Börnin eiga vikufrí í skólanum og við erum að vonast til þess að það hætti að rigna á okkur þannig að við getum eytt næstu viku í að skemmta okkur utandyra. Það er spáð rigningu en það má alltaf láta sig dreyma.

Og þá að þessu húsi í Wales. Það er í eigu Arne Maynard sem er einn virtasti garðhönnuður Bretlands og skrifar dálk með garðráðleggingum fyrir tímaritið Gardens Illustrated. Maynard og sambýlismaður hans keyptu þetta sögulega hús sem kallast Allt-y-bela, en það stendur í Usk í suðurhluta Wales. Það var fjallað um það í janúartölublaði Garden Design. Bókstafleg merking nafnsins á ensku væri „high wooded hillside of the wolf“ sem myndi hljóma skelfilega í beinni íslenskri þýðingu: há tré í hlíð úlfsins eða eitthvað svoleiðis - ég veit, skelfilegt en samt flott merking! En það sem er sérstaklega áhugavert við garðinn sjálfan er sú staðreynd að hann er ólíkur öllum þeim glæsilegu og rómantísku görðum sem Maynard hefur hannað í gegnum tíðina.

Fyrir garðinn í Wales valdi Maynard látlausa hönnun. Húsið sjálft er gamalt sveitasetur frá 15. öld og það var aldrei skipulagt neitt sérstaklega heldur bættu fyrrum eigendur við rýmum eftir hentugleika. Það sama gerðist eiginlega með garðinn í höndum Maynard. Hann byrjaði á því að fjarlægja allar girðingar, limgerði og slíkt á sinni eigin landareign þannig að garðurinn rynni saman í eitt og félli vel saman við nánasta umhverfi. Það var bara í kringum húsið sjálft þar sem hann hélt ákveðinni formfræði, eins og sést á myndunum.

Mér finnst landslagið þarna ákaflega fallegt. Þeir félagar eru með matjurtagarð og einnig eru þeir með hænsni sem þið getið séð á myndum í færslunni á ensku útgáfu bloggsins. Þar er einnig að finna tvær myndir sem voru teknar innandyra.

Sjáumst aftur í byrjun júní!

myndir:
Arne Maynard Garden Design

föstudagur, 17. maí 2013

góða helgi

Framundan er fjögurra daga helgi hér í Luxembourg og fyrir utan smá sól sem spáð er á morgun þá mun líklega rigna alla dagana. Ég er búin að lofa syni mínum poppkorni og Hringadróttinssögu-maraþoni sem við hefjum með Hobbitanum. Ég verð hér aftur á miðvikudaginn og óska ykkur góðrar helgar!

mynd:
El Mueble

fimmtudagur, 16. maí 2013

fallegar íbúðir til leigu í Suður-Frakklandi

Það er grenjandi rigning í mínum heimshluta þannig að mér finnst kjörið á þessum fimmtudegi að láta hugann reika eilítið sunnar á hnöttinn. Í þorpinu Lagrasse í Suður-Frakklandi, ekki ýkja langt frá Spáni, er hægt að taka á leigu fallegar íbúðir í gömlu húsi sem búið er að taka í gegn. Það voru hjónin Nicole Albert, sem áður vann sem stílisti, og Michael Nunan sem keyptu gamalt sveitasetur og endurnýjuðu það í þeim tilgangi að búa þar sjálf og leigja út tvær íbúðir.

Eins og sjá má á þessum myndum er stíllinn afskaplega fallegur; rómantískur án öfga. Húsgögn og aðrir munir koma frá antíksölum og mörkuðum í nágrenninu en einnig frá heimili þeirra hjóna í London.

Allar nánari upplýsingar er að finna á heimasíðu House La France (sjá tengil neðst).


myndir:
Sarah Hogan og Caroline Arber fyrir House La France af síðunni Remodelista

miðvikudagur, 15. maí 2013

uppskrift: hrísgrjón með indverskum kryddum og rúsínum

Ég var að pósta þessari uppskrift að hrísgrjónum með indverskum kryddum og rúsínum á matarbloggið. Hún er mjög svipuð þeirri sem ég póstaði um daginn en er laus við negulnagla og piparkorn. Ég er mjög hrifin af einföldu meðlæti og undanfarið hef ég verið nokkuð dugleg að leika mér með alls kyns útgáfur af grjónum með mat. Það getur verið gott að eiga afgang af grjónum til að hita upp í hádeginu daginn eftir og borða hrátt eða snöggsteikt grænmeti með. Einfalt og gott og klikkar ekki!

mynd:
Lísa Hjalt


þriðjudagur, 14. maí 2013

vatnslitamynd í eldhúsið


Á Etsy má finna margt hæfileikaríkt listafólk sem selur alls kyns muni eins og prentverk eða hvað sem er. Ég á nokkrar uppáhalds-„búðir“ á Etsy og Lucile's kitchen er ein þeirra. Þetta er vatnslitamynd eftir hana af hinum ýmsu kryddjurtum. Ég væri alveg til í að sjá þessa hangandi upp á vegg í eldhúsinu mínu í fallegum svörtum ramma.

mynd:
Lucile's kitchen á Etsy


miðvikudagur, 8. maí 2013

tískuþátturinn: Ferragamo

Ítalska tískuhúsið Ferragamo hefur hleypt af stokkum auglýsingaherferð sem nefnist L’Icona en tilgangur hennar er að enduruppgötva Vara-ballerínuskóna og að fagna því að fyrir 35 árum síðan voru þeir settir á markað. Ljósmyndarinn Claiborne Swanson Frank tók myndir af 21 stúlku í Vara eða Varina (settir á markað 2007) sem klæðast ýmist sínum eigin fötum eða uppáhaldsflíkunum sínum frá tískuhúsinu. Í þessum mánuði verður myndum og myndskeiðum með þessum flottu konum deilt á heimasíðu herferðarinnar.

Þær sem birtast hér eru Lauren Santo Domingo sem var mynduð í París (ég deildi nýverið myndum af heimili hennar í París á ensku útgáfu bloggsins), Asia Baker sem var mynduð í Palm Beach, Flórída, og Miroslava Duma sem sat fyrir í Moskvu.

Mér finnst þetta frábær hugmynd til þess að fagna afmæli skónna sem eru orðnir klassískir. Hvort sem við eigum þessa skótegund eða ekki þá má nota myndirnar til þess að fá hugmyndir. Ballerínuskór paraðir við gallabuxur og rykfrakka, eins og Lauren Santo Domingo gerir á efstu myndinni, er samsetning sem fer aldrei úr tísku.

myndir:
Claiborne Swanson Frank fyrir Ferragamo L’Icona auglýsingaherferðina 2013


þriðjudagur, 7. maí 2013

hattar fyrir sumarið

Eigið þið góðan hatt fyrir sumarið?

Ég minntist á það í gær að koma upp hattasafni vegna ljósmyndar af inngangi húss í Suður-Afríku sem sýndi nokkra sumarhatta á snaga. Ég er búin að hugsa um hatta síðan og mátti því til með að „gramsa“ aðeins í möppunum mínum.

Þessir hattar koma mér í sumargírinn.

myndir:
1: Tesh fyrir Asos Magazine, ágúst 2010 | módel: Olivia Palermo / 2: Boden USA / 3: Bittersweet Colours / 4: Studio (fr.), júlí/ágúst 2004 | módel: Vanessa Paradis


mánudagur, 6. maí 2013

Innlit: hlýlegt sænskt heimili í Suður-Afríku

Ég rakst á þetta innlit á netinu um daginn. Húsið er í eigu sænskra hjóna sem búa í Somerset West í nágrenni Cape Town í Suður-Afríku. Húsið sjálft er byggt í hollenskum stíl og eins og sjá má þá er heimilið hlýlegt með fallegum viðarhúsgögnum og gólfborðum.

Myndirnar af innganginum og svefnherberginu fóru ekki úr huga mér. Það var svo ekki fyrr en um helgina að ég kveikti, ég hafði séð þær áður hjá einni bloggvinkonu sem býr í Suður-Afríku. Athyglisvert samt að þegar hún póstaði þeim fyrir um ári síðan þá var það meira húsið sjálft sem sat í mér. Kannski merki þess að smekkur okkar mótast og tekur breytingum með tímanum.

Yfirleitt eru svefnherbergi höfð frekar aftarlega í innlitum en ég leyfi mér að brjóta þær óskrifuðu reglur. Þegar ég var að skoða þessar fyrstu tvær ljósmyndir þá datt mér í hug kvikmyndin Out of Africa (1985) í leikstjórn Sydney Pollack þar sem Meryl Streep túlkar Karen Blixen. Það var einhver hlýleiki á heimili hennar í Afríku í myndinni sem rifjaðist upp fyrir mér þegar ég var að virða þessi tvö rými fyrir mér.

Ég er svo búin að ákveða að stela einni hugmynd úr þessu innliti. Ég ætla að finna lítið borð, eða láta eiginmanninn smíða það, fyrir innganginn okkar og hafa nokkrar bækur á því. Það er eitthvað svo notalegt við þessa uppsetningu. Það hlýtur að vera ljúft að sjá bækur um leið og maður opnar dyrnar að heimili sínu.

Kannski að ég ætti að koma mér upp svona fínu hattasafni líka og geyma fyrir ofan þær?

Eins og oft áður þá pósta ég ekki öllu innlitinu. Fylgið tenglinum að neðan ef þið viljið sjá nokkrar myndir til viðbótar.

myndir:
Micky Hoyle fyrir House and Leisure af blogginu Roses and Rust


föstudagur, 3. maí 2013

góða helgi

Þessi grein er í vasa á skrifborðinu mínu og það liggur við að hún bæti við sig blómum á hverjum degi. Ég klippti hana óvart þegar ég var að hreinsa dauðar greinar í garðinum um daginn og rétt náði að bjarga henni áður en hún endaði í lífrænu tunnunni. Kannski hafið þið nú þegar séð þessa mynd á ensku útgáfu bloggsins en mig langaði að halda henni til haga hér líka því hún minnir mig á þetta vor sem lét sjá sig nokkuð seint, en olli svo sannarlega ekki vonbrigðum þegar það loksins kom.

Góða helgi!

mynd:
Lísa Hjalt