mánudagur, 24. desember 2012

gleðileg jól



Jæja, nú eru jólin heldur betur að fara að koma. Bóndinn er búinn að setja hangikjötið í pottinn og lyktin berst um allt hús. Börnin koma reglulega niður og taka einn hring í eldhúsinu - þau bókstaflega elska hangikjöt og við borðum það jú bara einu sinni á ári. Ég er búin að gera grautinn fyrir risalamande-ið og kirsuberjasósuna, sem við berum fram með grautnum.

Við vorum alltaf með kalkúnamáltíð á aðfangadag og vorum þá meira og minna í eldhúsinu allan daginn að undirbúa. Svo gerðist það ein jól þegar við fjölskyldan vorum í Kaupmannahöfn að ofninn í íbúðinni sem við vorum í reyndist bilaður og því ekki hægt að elda kalkún. Það var ekkert annað í stöðunni en að fá sent hangikjöt frá Íslandi. Þennan dag fannst okkur við eiga allan tímann í heiminum því þetta var svo einföld eldamennska. Við ákváðum síðar að taka upp þennan sið, nota aðfangadag til að slaka á í eldhúsinu og stússast meira yfir pottum og pönnum á jóladag.

Hjá mér verða þetta bókajól. Eftir matinn í kvöld hyggst ég koma mér þægilega fyrir á legubekknum og á borðinu bíður mín sæmilegur stafli af bókum. Hluti af þeim er á myndinni. Ég er að vísu búin að lesa appelsínugula doðrantinn, sjálfsævisögu Grace Coddington, sem ég talaði um fyrr á blogginu (er í raun ekki doðrantur því letrið í bókinni er stórt.) Hún var skemmtileg aflestrar en mér fannst vanta meiri dýpt í hana. Hún fer hratt yfir sögu og eyðir yfirleitt ekki mörgum orðum í erfið tímabil í lífi sínu. Hún lýsir vel starfi sínu innan tískugeirans og hún lætur það eiga sig að segja slúðursögur, sem ég kann vel að meta. Mér leiðist það ógurlega að lesa ævisögur fólks sem eru fullar af slúðri um aðra. En eins og ég sagði, það vantar dýpt í bókina.

Bókin sem ég ætla að byrja á eftir matinn og pakkana í kvöld heitir Balenciaga and Spain og er rituð af Hamish Bowles (sá sami og skrifar fyrir Vogue US). Mig hefur lengi langað til að lesa um tískuhönnuðinn Cristóbal Balenciaga (1895-1972) en ég vissi eiginlega ekki hvaða bók ég ætti að velja. Það var svo góð bloggvinkona mín, Ada sem heldur úti blogginu Classiq, sem mælti sérstaklega með þessari. Ég lét eiginmanninn gefa mér hana í jólagjöf og mér líst mjög vel á hana. Hún er stútfull af spænskri menningu og list, akkúrat eins og ég vil hafa tískubækur. Ég ætla svo að klára að lesa Anna Karenina eftir Tolstoy og á bókasafninu um daginn rak ég augun í The Great Gatsby eftir Fitzgerald og ákvað að lesa hana aftur. Ég hugsa að ég komist varla yfir meira þessi jól.

Ég óska ykkur öllum gleðilegra jóla og enda færsluna á einu af mínum uppáhaldsjólalögum, hér í flutningi Coldplay.



mynd:
Lísa Hjalt

You Tube: Coldplay / Have yourself a merry little Christmas

fimmtudagur, 20. desember 2012

rólegur dagur í borginni


Ég þurfti aðeins að skreppa inn í borg í gær og smellti af einni mynd á Rue du St. Esprit þar sem það voru svo fáir á ferli. Það er alltaf jafn fallegt að horfa þarna yfir. Það var töluvert af fólki á verslunargötunum en ég varð ekki vör við neitt jólastress. Þetta eru fyrstu jólin okkar hér og mér sýnist Lúxarar vera nokkuð spakir í desember.

mynd:
Lísa Hjalt

þriðjudagur, 18. desember 2012

jól í ástralskri sveitasælu


Þetta er nú töluvert ólíkt þeirri jólastemningu sem við eigum að venjast á norðurhveli jarðar, en svona er hægt að hafa það notalegt á jólunum í ástralskri sveitasælu.

myndir:
Sharyn Cairns | stílisering Glen Proebstel fyrir Country Style Australia af blogginu Dustjacket Attic

mánudagur, 17. desember 2012

luxembourg: jólamarkaður á place d'armes


Ég fór inn í borg á laugardaginn og ætlaði að festa jóladýrðina á filmu en áttaði mig á því að ég hafði gleymt að hlaða batteríið. Ég náði því ekki að taka nema þessar fjórar myndir áður en vélin fór að hætta að vinna eðlilega. En hvað um það, þær fanga stemninguna á Place d'Armes torgi. Það er torgið sem er í kjarna borgarinnar og út frá því liggja hellulagðar götur með verslunum. Kosturinn við borgarkjarnann í Luxembourg er sá að bílaumferð er mjög takmörkuð og engin í helstu verslunargötunum. Fyrstu myndina tók ég fyrir utan blómabúð á Rue Philippe II, sem er rétt hjá torginu. Það eru alltaf svo sætar skreytingar fyrir utan þessa búð og á laugardaginn var einstaklega jólalegt hjá þeim. Þessi tré með gervisnjó heilluðu mig einna helst.

Ef þið eruð að ferðast um Evrópu á þessum árstíma þá mæli ég með að fara til Luxembourg. Borgin er svo fallega skreytt og allt er frekar lítið og kósí í sniðum.

Þetta var annars notaleg helgi. Þarna á laugardeginum fórum við á bókasafnið og svo kippti ég með sushi á leiðinni heim og át á mig gat. Í gær fórum við að sjá The Hobbit: An Unexpected Journey (2012) og við urðum ekki fyrir vonbrigðum. Þetta var ekkert annað en 3D veisla fyrir augað; Peter Jackson og allir þeir sem komu að þessari mynd eru ekkert annað en helv... bölv... snillingar, eins og bóndinn myndi orða það. Nú er ég ekki mikið fyrir svona ævintýramyndir en við erum miklir aðdáendur Lord of the Rings myndanna og vorum búin að bíða spennt eftir þessari. Núna bíðum við enn þá spenntari eftir framhaldinu.

myndir:
Lísa Hjalt

laugardagur, 15. desember 2012

uppskrift: súkkulaðibitakökur með möndlum og haframjöli


Í gær lofaði ég ykkur aukafærslu og hér er uppskriftin sem ég minntist á, súkkulaðibitakökur með möndlum og haframjöli. Ég setti þessa saman á fimmtudaginn og bakaði svo kökurnar aftur í gær til að vera alveg viss um að uppskriftin væri skotheld. Í öllu þessu sykursulli sem dynur á fólki fyrir jólin þá er oft ágætt að huga að innihaldinu í því sem við erum að baka. Þessar eru ekki lausar við sykur, alls ekki, en sykurmagnið er hóflegt og það er ekkert smjör í þeim. Þær eru samt dásamlega bragðgóðar.

mynd:
Lísa Hjalt

föstudagur, 14. desember 2012

góða helgi


Það stóð nú til að skella inn fleiri færslum þessa viku en nettengingin bilaði á miðvikudaginn og í gær var
ég að stússast í bakstri og var búin að steingleyma foreldrafundi úti í skóla. Ég bæti ykkur þetta upp á
morgun með aukafærslu með uppskrift að súkkulaðibitakökum með möndlum og haframjöli. Ég var að
tilraunast í eldhúsinu í gær og krakkarnir voru alveg vitlausir í þessar kökur = tilraun heppnaðist vel.

mynd:
Angus Fergusson fyrir Canadian House & Home

þriðjudagur, 11. desember 2012

rómantísk og sveitarleg jól


Þessar rómantísku og sveitarlegu myndir eru hluti af auglýsingaherferð H&M Home fyrir jólin í fyrra en eru tímalausar. Ef þessi sæta stofa á fyrstu myndinni væri mín þá myndi ég bara henda út þessari galvaniseruðu fötu og nota fallega viðarfötu eða -kassa í staðinn. Ég þoli ekki galvaniseraðar vörur innandyra. Ég set þær í sama flokk og bækur raðaðar eftir litum; mér verður beinlínis illt í augunum þegar ég sé svoleiðis.

Eruð þið ekki annars komin í jólaskap? Ég er að byrja að undirbúa afmælisveislu fyrir yngstu dótturina sem er ellefu ára í dag. Hún ætlar að koma með tvær vinkonur heim eftir skóla og ég er náttúrlega búin að lofa að baka allt sem hún bað um. Ég er voðalega fegin að eiga ekki von á öllum stelpunum í bekknum í hús. Ég er lítið fyrir risastór barnaafmæli og sem betur fer eru börnin á sömu skoðun.

myndir:
H&M Home jól 2011 auglýsingaherferð

mánudagur, 10. desember 2012

vetrarstemning + vinningshafi í lesendaleik


Ég tók þessar myndir á laugardaginn þegar ég skrapp í göngutúr með dætrunum. Það hafði snjóað og sólin skein þannig að náttúran skartaði sínum fallegasta vetrarbúningi. Þessi helgi hefði ekki getað verið jólalegri, það var dásamlegur matur á borðum, bóndinn sá um hátíðlega jólatónlist og við nutum þess að drekka jólaglögg, bæði áfengt og óáfengt.

Nú skal tilkynna sigurvegarann í BESOTTED BRAND LESENDALEIKNUM.

Ég er búin að draga nafn úr pottinum og fallegu, handprentuðu 'thank you' kortin eru á leiðinni til Íslands. Sú heppna er:

Þorbjörg, sem skráði sig í leikinn á íslensku útgáfu LatteLísa, en leikurinn var á báðum síðunum.

Til hamingju Þorbjörg! Vinsamlegast sendu mér heimilisfangið þitt í tölvupósti svo ég geti áframsent það til Tristan B hjá Besotted Brand.

BESOTTED BRAND er vefverslun fyrir alla sem hafa áhuga á fallegri hönnun, bréfsefnum og hreinlega öllu til að gera handrituð skeyti og bréf persónulegri. Besotted Brand býður upp á póstsendingu um allan heim og ef þú ert að panta meira en eitt stykki þá er öllu pakkað í einn kassa þannig að þú borgar bara eitt sendingargjald miðað við þá þyngd (þú færð mismuninn af sendingargjaldinu endurgreiddan).

myndir:
1-4: Lísa Hjalt / 5: Besotted Brand

fimmtudagur, 6. desember 2012

rýmið 16


- stofa í Upper West Side, NY
- hönnuður og eigandi Susan Becher

mynd:
Patrick Cline fyrir Lonny, nóvember/desember 2011, bls. 203


miðvikudagur, 5. desember 2012

holmegaard jólastemning


Ein af mínum uppáhaldsborgum í desember er án efa Kaupmannahöfn. Ég var svo heppin að búa í borginni um tíma og upplifði því danska jólastemningu til hins ítrasta. Það jafnaðist fátt á við það að rölta um skreyttar götur og taka einn hring í Illums Bolighus til að dást að fallegri skandinavískri hönnun. Jólavörurnar frá Holmegaard voru í miklu uppáhaldi og eru enn. Ég fann þessar myndir á síðunni þeirra. Þær eru frá því í fyrra en hönnunin er klassísk.

myndir:
af vefsíðu Holmegaard

miðvikudagur, 28. nóvember 2012

tískuþátturinn: ELLA vetur 2012


Ég er hrifin af nýju auglýsingunum frá ELLU - skemmtileg stemning í fallegum svarthvítum myndum. Ég er sérstaklega hrifin af kápunni og alveg viss um að ég myndi dansa um göturnar ef ég ætti þennan flotta hatt.

Vel gert hjá Elínrós Líndal og hennar teymi.

myndir:
ELLA Vetur 2012 auglýsingaherferð af ELLA heimasíðunni og Facebook síðunni

þriðjudagur, 27. nóvember 2012

rýmið 14


- stofa í Greenwich Village, NY
- stór skemill úr geitaskinni þjónar sem borð
- hönnuður Christine Markatos Lowe

mynd:
William Waldron fyrir Architectural Digest

mánudagur, 26. nóvember 2012

uppskrift: heitt súkkulaði með heimagerðum vanillusykri


Þetta telst nú varla til uppskrifta en ég var að setja inn á matarbloggið mína blöndu af heitu súkkulaði með heimagerðum vanillusykri, sem er ansi vinsælt á þessu heimili. Það er nú enginn vetur í Luxembourg enn þá en það er jú kaldara úti og gott að ylja sér með eins og einum bolla. Á virkum dögum notum við yfirleitt engan rjóma út í heldur berum súkkulaðið fram með nýbökuðu brauði. En um helgar förum við alla leið, notum rjóma eða lífrænan vanilluís og bökum helst eplaköku líka.

mynd:
Lísa Hjalt

föstudagur, 23. nóvember 2012

góða helgi


Í stað þess að leita í smiðjur annarra þá ákvað ég bara að taka sjálf myndina fyrir þessa 'góða helgi' færslu. Ég veit ekki með ykkur en nellikur eru blóm sem ég er farin að kunna betur og betur við. Þær eru ódýrar og lífseigar og það hentar mér vel þar sem ég elska að hafa fersk blóm í vösum á víð og dreif um heimilið.

Góða helgi!

mynd:
Lísa Hjalt

fimmtudagur, 22. nóvember 2012

kaffi & lestur


Fyrir utan bardagahljóðin í sjö ára syninum sem berast frá efri hæðinni þá er ákaflega notalegt í kotinu núna. Skólinn er búinn snemma hjá krökkunum á fimmtudögum þannig að við erum búin að gera allt sem þarf að gera, erum komin í þægilegu fötin og búin að skella í brauð. Á meðan það bakast gæðum við okkur á mandarínum - og kaffi fyrir mig - og ýmist lesum eða horfum á mynd.

Nýjustu tímaritin í staflanum eru Travel + Leisure, þýska Vogue og franska Art & Décoration. Það er góður skammtur. Bækurnar eru nokkrar. Ég er nýbyrjuð að lesa Gielgud's Letters sem er samansafn bréfa sem breski leikarinn John Gielgud (1904-2000) skrifaði um ævina. Þetta er ágætis doðrantur, vel yfir 500 síður. Ég tók svo á bókasafninu um daginn kvikmyndina Tinker Tailor Soldier Spy (2011) með Gary Oldman og fleiri frábærum leikurum. Ég skelli henni vonandi í tækið í kvöld.

Ég veit að þeir sem fylgjast með þessu bloggi eru kannski ekki þeir allra duglegustu að skrifa ummæli við færslurnar en mér finnst alltaf gaman að heyra hvað fólk er að lesa.


myndir:
Lísa Hjalt

miðvikudagur, 21. nóvember 2012

bók: sjálfsævisaga grace coddington


Út er komin bókin Grace: A Memoir, sjálfsævisaga Grace Coddington sem flestir ættu að þekkja ef þeir á annað borð fylgjast eitthvað með tísku. Grace er listrænn stjórnandi hjá ameríska Vogue og er þekkt fyrir áhugaverða og metnaðarfulla tískuþætti í tímaritinu. Það muna örugglega margir eftir henni úr heimildarmyndinni The September Issue (2009) þar sem hún bókstaflega stal senunni. Ferill Grace innan tískugeirans er orðinn ansi langur þar sem hún byrjaði ung að sitja fyrir. Hún hætti fyrirsætustörfum eftir bílslys og fór að starfa hjá breska Vogue. Árið 1988 fór hún yfir til ameríska Vogue og hefur starfað þar síðan.

Ég er búin að bíða eftir þessari bók lengi og hlakka til að lesa hana um jólin.


myndir:
úr bókinni Grace: A Memoir eftir Grace Coddington, gefin út af Random House | af síðu Vogue UK

þriðjudagur, 20. nóvember 2012

rýmið 13


Ég veit því miður ekki nánari deili á því hver hannaði þetta eldhús. Það birtist í tímaritinu Maisons Côte Sud.

mynd:
Henri Del Olmo fyrir Maisons Côté Sud af blogginu My Paradissi

mánudagur, 19. nóvember 2012

lesendaleikur: sett af tíu 'thank you' kortum frá besotted brand


Nú fara jólin að nálgast og því fannst mér kominn tími til að hafa LESENDALEIK til þess að þakka fyrir heimsóknirnar á bloggið og til að bjóða nýja lesendur velkomna. Í samstarfi við Tristan B, eiganda Besotted Brand, ætlum við að gefa einum heppnum lesanda tækifæri til að vinna fallegt sett með tíu handprentuðum 'thank you' kortum.

Besotted Brand býður upp á fallegt úrval af bréfsefnum, stimplum, merkimiðum, tvinnum og hreinlega öllu því sem þarf til að koma frá sér einhverju handskrifuðu. (Þið munið kannski eftir bloggfærslu sem ég skrifaði um vefverslunina í ágúst sl.). Besotted Brand býður líka upp á sérhannaðar vörur sem gerir handverkið enn persónulegra. Allt kemur í fallegum pakkningum þannig að þetta eru tilvaldar tækifærisgjafir. Ef þú ert í gjafahugleiðingum fyrir jólin þá endilega skoðaðu úrvalið á vefversluninni. Besotted Brand býður upp á póstsendingu um allan heim og ef þú ert að panta meira en eitt stykki þá er öllu pakkað í einn kassa þannig að þú borgar bara eitt sendingargjald miðað við þá þyngd (þú færð mismuninn af sendingargjaldinu endurgreiddan).

LESENDALEIKUR BESOTTED BRAND: SETT AF HANDPRENTUÐUM 'THANK YOU' KORTUM

Besotted Brand ætlar að gefa einum LatteLísa-lesenda uppáhaldshönnunina mína frá þeim, þetta fallega sett af handprentuðum 'thank you' kortum. Lesendaleikurinn er opinn öllum og fer fram á bæði íslensku og ensku útgáfu LatteLísa.

Kortin eru innflutt frá Ítalíu og pappírinn er unninn úr 100% bómull. Orðsendingin 'thank you' er handprentuð á kortin og þess vegna eru engin tvö kort nákvæmlega eins, sem eykur sjarma þeirra. Í settinu eru 10 kort og 10 umslög sem er búið að pakka fallega í kassa og því er þetta frábær tækifærisgjöf.

ALLIR GETA VERIÐ MEÐ:

Það sem þú þarft að gera til að vera með er að fylgja LatteLísa á Facebook eða Google+ og setja inn ummæli fyrir neðan þessa færslu. Það væri til dæmis gaman að heyra hvað þér finnst um hönnunina frá Besotted Brand. (Ef þú fylgir LatteLísa á Pinterest eða Bloglovin' þá því miður telst það ekki með því ef þú vinnur þá get ég ekki sent þér póst til að láta þig vita.)

Til að vera með í leiknum þarf að setja inn ummæli við þessa færslu í síðasta lagi laugardaginn 8. desember 2012. Tilkynnt verður um vinningshafa á blogginu mánudaginn 10. desember.


Þegar þú hefur skráð þig með ummælum hér að neðan þá hefurðu tvær leiðir til að auka líkurnar á því að vinna:

a. Eitt auka stig (samtals tvö):
Notarðu Pinterest? Pinnaðu þessa mynd af 'thank you' kortunum eða þessa. Ef þú pinnar báðum þá færðu tvö auka stig.

ef þú pinnar þá vinsamlegast skrifaðu 'pinnaði einni' eða 'pinnaði báðum'
í athugasemdina þína hér að neðan og ég veit hvað átt er við

b. Fimm auka stig:
Ef þú ert með blogg þá geturðu skrifað þína eigin bloggfærslu um lesendaleikinn. Þú mátt fá myndirnar af 'thank you' kortunum lánaðar en vinsamlegast taktu það fram í færslunni þinni að þær koma frá Besotted Brand. Í færslunni þarf að vera tengill á þessa bloggfærslu og á vefverslun Besotted Brand.
ef þú bloggar um lesendaleikinn skildu þá eftir athugasemd þegar þú er búin/n
að pósta færslunni og láttu tengilinn (URL) á færsluna þína fylgja


TAKK FYRIR AÐ VERA MEÐ Í LEIKNUM ... OG VONANDI HEFURÐU HEPPNINA MEÐ ÞÉR!

fimmtudagur, 15. nóvember 2012

maison martin margiela í h&m


Eins og margir vita hefur H&M keðjan verið í samstarfi við ýmis þekkt tískuhús sem sérhannar fatalínur sem eru
svo seldar í ákveðnum H&M verslunum. Þarna gefst almenningi tækifæri á að eignast tískumerki á mun lægra verði.
Nú síðast var það tískuhúsið Marni sem gerði allt vitlaust og fólk beið í biðröðum klukkutímum saman fyrir utan H&M
til þess að versla. Í morgun var það sérhönnuð lína frá tískuhúsinu Maison Martin Margiela sem fékk fólk til þess að
standa í biðröð. Það er hleypt inn í búðirnar í hollum og ég held að ég fari rétt með að hver og einn geti bara keypt x
margar flíkur og aukahluti því töluvert er um það að fólk versli til þess eins að selja flíkurnar á hærra verði á Ebay.

Tískuteikningin hér að ofan er eftir eina ástralska bloggvinkonu mína, Helen sem skrifar bloggið The Style Schedule,
en einn kjóll úr línu MMM fyrir H&M var hennar innblástur. Myndin fyrir neðan sýnir kjól úr línunni sem má skoða til
dæmis hér.


myndir:
1: Helen af blogginu The Style Schedule / 2: Sam Taylor-Johnson fyrir Maison Martin Margiela / H&M